Իրանը հայտարարել է, որ կարող է հարվածներ հասցնել Իրաքյան Քուրդիստանի ահաբեկչական խմբավորումներին

Իրանի զինված ուժերը կարող են հարվածներ հասցնել Իրաքյան Քուրդիստանի ահաբեկչական խմբավորումներին, եթե դրանք սպառնան իսլամական հանրապետության անվտանգությանը: Այդ մասին երկուշաբթի հայտարարել է Իսլամական հեղափոխության պահապանների կորպուսի ցամաքային զորքերի հրամանատար, բրիգադային գեներալ Մոհամմադ Պակպուրը:

«Զինված ահաբեկչական խմբավորումները փորձում են օգտագործել Հյուսիսային Իրաքը Իրանի հետ սահմանամերձ գոտում անվտանգության սպառնալիքներ ստեղծելու համար»,- մեջբերում է IRNA գործակալությունը:

Զինվորականների կարծիքով՝ «նման իրավիճակի շարունակությունն անընդունելի է Իրանի համար, և Թեհրանը համապատասխանաբար կպատասխանի ահաբեկիչներին, ուստի այս տարածքի բնակիչները պետք է հեռու մնան ահաբեկչական խմբավորումների գտնվելու վայրից»:

Պապկուրը հավելել է, որ «Իրաքի կառավարությունները և Իրաքի քրդական ինքնավարությունը չպետք է թույլ տան, որ ահաբեկիչներն այս տարածքում ստեղծեն բջիջներ, որոնք սպառնում են Իրանին»: «Մենք այս ոլորտում ցանկացած անվճռականություն կամ անփութություն դիտարկում ենք որպես բարիդրացիության սկզբունքի խախտում՝ հակառակ մեր երկրների լավ հարաբերությունների»,- ասել է նա:

Երկրի արևմուտքում գտնվող սահմանամերձ շրջաններն Իրանի համար լարվածության աղբյուրներից են: Մաքսանենգ ապրանքների զգալի մասը ներկրվում է Իրաքի սահմանով Իրանի տարածք: Բացի դրանից՝ Իրաքյան Քուրդիստանի հետ սահմանին պարբերաբար բախումներ են տեղի ունենում իրանցի սահմանապահների և քրդական կազմակերպությունների անդամների միջև: Թեհրանը պնդում է, որ հակակառավարական կազմավորումների զգալի մասը հիմնված է Իրաքյան Քուրիդստանի տարածքում: