Հայերը կողմ են անկախությանը. Իրաքյան Քուրդիստանի հայ պատգամավոր

Իրաքի քրդական շրջանային կառավարության խորհրդարանի հայ պատգամավոր Արամ Շահին Բակոյանը «Ակօս»-ի հետ զրույցում հայտարարել է, որ Իրաքյան Քուրդիստանում բնակվող հայերը նույնպես «այո» են ասել անկախությանը:

Բակոյանը նշել է, որ քրդերի իրականացրած անկախության հանրաքվեն հետաքրքրում է այդ շրջանում բնակվող մոտ 4000 հայերի, որոնց մեծամասնությունը չի տիրապետում հայերենին և փոխարենը խոսում է քրդերեն կամ արաբերեն:

Հայ պատգամավորի խոսքով՝ 4000 հայերից 650-ը մասնակցել է հանրաքվեին:

«Ըստ իս՝ հայերի մեծ մասը «այո» է քվեարկել: Հայերն ու քրդական ղեկավարությունը սերտ հարաբերությունների մեջ են 2015 թվականից, հետևաբար, այն, ինչ լավ է քրդերի համար, հայերի համար էլ է լավ: Մենք կողմ ենք անկախությանը, սա դրական փոփոխություն է լինելու»,-ասել է Բակոյան:

Նշենք, որ ըստ վերջնական արդյունքների՝ անկախության օգտին քվեարկել է բնակչության 92.73 տոկոսը, դեմ է քվեարկել 7.2 տոկոսը: