Թուրքիայի ՊՆ-ն Հունաստանին մեղադրել է սադրանքի և լարվածության սրման մեջ

Հուլիսի 11-ին Թուրքիայի պաշտպանության նախարար Հուլուսի Աքարը քննադատել է իր հույն պաշտոնակից Նիկոլաոս Պանագիոտոպուլոսի հայտարարությունները Թուրքիայի վերաբերյալ:

«Հունաստանը շարունակում է հավատարիմ մնալ սադրիչ, անօրինական, անհաշտ և սրող դիրքորոշմանը, որը հակասում է իր կնքած պայմանագրերին»,- ասել է Աքարը:

Թուրքիայի պաշտպանության նախարարի խոսքերն արվել են այն բանից հետո, երբ Պանագիոտոպուլոսը քննադատել է Թուրքիային առցանց հանդիպման ժամանակ՝ ասելով, որ Անկարան գործում է միջազգային իրավունքի դեմ և ստեղծում ամբողջ տարածաշրջանի ապակայունացման ռիսկ: Աքարը Պանագիոտոպուլոսի հռետորաբանությունը որակել է որպես անհամապատասխան Թուրքիայի նախագահ Ռեջեփ Թայիփ Էրդողանի և Հունաստանի վարչապետ Կիրիակոս Միցոտակիսի վերջին կառուցողական բանակցություններին, ինչպես նաև այս ամռանը լարվածությունը լիցքաթափելու ջանքերին:

«Ես կոչ եմ անում իմ հարգարժան գործընկերոջը՝ մտածել և խոսել երկկողմ համաձայնագրերի, միջազգային իրավունքի և բարիդրացիության, ողջամտության, տրամաբանության, արդարության և օբյեկտիվության շրջանակներում` հեռու մնալով եսասիրությունից և հուզականությունից»,- շեշտել է նա:

Աքարը նաև ասել է, որ Թուրքիան կարևոր երկիր է, որը նպաստում է խաղաղությանն ու կայունությանը այնպիսի տարածաշրջանում, ինչպիսին Մերձավոր Արևելքն է, նաև ավելացրել է, որ Անկարան հարցերը լուծելիս միշտ հենվում է միջազգային իրավունքի, երկխոսության և բարիդրացիական հարաբերությունների վրա: