Որևէ անգամ չեմ զգացել, որ ԵՊՀ իրավագիտության ֆակուլտետի որևէ դասախոս ժողովրդի նկատմամբ ատելություն տարածի․ Արման Թաթոյանը՝ Փաշինյանի հայտարարության մասին

ՀՀ Մարդու իրավունքների պաշտպան Արման Թաթոյանը ֆեյսբուքյան իր էջում գրառում է արել՝ անդրադառնալով Նիկոլ Փաշինյանի՝ ԵՊՀ իրավագիտության ֆակուլտետի մասին այսօրվա հայտարարություններին։

Հիշեցնենք, որ այսօր Նիկոլ Փաշինյանը Տավուշի մարզում ելույթի ժամանակ անդրադարձել էր ԵՊՀ իրավագիտության ֆակուլտետին՝ նշելով, որ Հայաստանում գոյություն է ունեցել իշխող էլիտա, որն անընդհատ իրեն վերարտադրում է, և բոլոր պետական պաշտոններն այդ էլիտայի ներկայացուցիչների համար են եղել, և այսօր դա ամենաշատը երևում է իրավաբանների վրա։

Նա հայտարարել էր, թե ԵՊՀ իրավաբանական ֆակուլտետում կլոնացված իրավաբանական համակարգ է ձևավորվել, որի 60 տոկոսը պարզապես ատում է սեփական ժողովրդին։

Արման Թաթոյան գրառումը ներկայացնում ենք ստորև․

«ԵՊՀ իրավագիտության ֆակուլտետի դասախոսներն են այն շրջանավարտներին դասավանդել, ովքեր այսօր աշխատում են Կառավարության ղեկավար մարմիններում, դատական իշխանության և իրավապահ մարմինների համակարգում:

Արդյոք այս շրջանավարտներն ատելությամբ են լցված ժողովրդի նկատմամբ:

Ինքս սովորել եմ ԵՊՀ իրավագիտության ֆակուլտետի բակալավրիատում, մագիստրատուրայում, ասպիրանտուրայում, իսկ 2005 թվականից ֆակուլտետում դասավանդում եմ:

Որևէ անգամ չեմ նկատել կամ զգացել, որ ֆակուլտետի որևէ դասախոս ժողովրդի նկատմամբ տարածի ատելություն»: