ԱՄՆ պետքարտուղարի օգնականը հորդորել է Ադրբեջանին և Հայաստանին՝ սահմանը գծել ԽՍՀՄ քարտեզների հիման վրա

Նախօրեին ԱՄՆ պետքարտուղարի օգնական Ֆիլիպ Ռիքերը մամուլի ասուլիս է հրավիրել Բաքվում՝ Ադրբեջան կատարած այցի և այդ երկրի նախագահ Իլհամ Ալիևի հետ բանակցությունների արդյունքներն ամփոփելու համար:

Ռիքերը հայտնել է Վաշինգտոնի մտահոգությունը Հայաստանի հետ Ադրբեջանի սահմանին լարվածության աճի կապակցությամբ: ԱՄՆ պետքարտուղարի օգնականը կոչ  է արել Ադրբեջանի և Հայաստանի կառավարություններին՝ սահմանազատում իրականացնել խորհրդային շրջանում հանրապետությունների միջև առկա սահմաններով: Ամերիկացի դիվանագետի խոսքով՝ ԱՄՆ-ը պատրաստ է տեխնիկական աջակցություն ցուցաբերել այս ուղղությամբ:

Ֆիլիպ Ռիքերը ևս մեկ անգամ բարձրաձայնել է պետքարտուղար Բլինքենի և նախագահ Ջո Բայդենի դիրքորոշումը, որ ԱՄՆ-ը Ռուսաստանի և Ֆրանսիայի հետ համատեղ պատրաստ է մասնակցել Հայաստանի և Ադրբեջանի հակամարտության լուծման որոնմանը:

Հավելենք, որ այսօր նախատեսվում է Ռիքերի այցը Հայաստան։