Գերմանիան մեկ դար առաջ տեղի ունեցած ցեղասպանության համար Նամիբիային 1.3 միլիարդ դոլար կվճարի. ավելի վաղ Ֆրանսիան էր ճանաչել Ռուանդայի ցեղասպանությունը

Գերմանիան պաշտոնապես ներողություն է խնդրել 20-րդ դարի սկզբին կայսերական Գերմանիայի գաղութային զորքերի կողմից ժամանակակից Նամիբիայի տարածքում հերերո և նամա ցեղերի կոտորածների համար: Այդ ժամանակ սպանվել էին այս ցեղերի տասնյակ հազարավոր ներկայացուցիչներ:

«Հաշվի առնելով Գերմանիայի պատմական և բարոյական պատասխանատվությունը՝ մենք Նամիբիայից և զոհերի սերունդներից ներողություն ենք խնդրում»,- ասել է Գերմանիայի արտաքին գործերի նախարար Հայկո Մաասը:

Նախարարը նաև շեշտել է, որ այսուհետ Գերմանիան 1904-1908 թվականներին տեղի ունեցած կոտորածները պաշտոնապես ցեղասպանություն կկոչի:

Որպես փոխհատուցում՝ Գերմանիան 1.3 միլիարդ դոլար կծախսի նամիբիացիներին և զոհերի ժառանգներին ֆինանսական աջակցություն ցուցաբերելու համար: Մաասը շեշտել է, որ գումարը վճարվում է «զոհերին հասցված հսկայական տառապանքի» համար:

Գումարը Գերմանիան վճարելու է 30 տարիների ընթացքում. միջոցները կուղղվեն Նամիբիայի ենթակառուցվածքային նախագծերին, երկրի բնակիչների առողջապահությանը և կրթության ու վերապատրաստման տարբեր ծրագրերի:

Այս որոշումը արդյունք էր Նամիբիայի հետ հնգամյա բանակցային գործընթացի. պետությունը 1884-1915 թվականներին գտնվել էր գերմանացիների օկուպացիայի տակ:

Գերմանիան 2015-ին ճանաչել է ցեղասպանության փաստը, որից հետո Նամիբիայի հետ բանակցություններ էին սկսվել ֆինանսական փոխհատուցման վերաբերյալ: Այնուամենայնիվ, ցեղի մի շարք առաջնորդներ հրաժարվեցին ճանաչել Նամիբիայի և Գերմանիայի միջև փոխհատուցման պայմանագիրը. հայտնում է Նամիբիայի «Նոր դարաշրջան» պետական թերթը:

Նշենք, որ Մաասի հայտարարությունից մեկ օր առաջ էլ Ռուանդայում տեղի ունեցած ցեղասպանության համար Ֆրանսիան էր ներողություն խնդրել՝ ընդունելով սեփական պատասխանատվությունը։