Ռուանդայի ցեղասպանության արխիվն է բացվելու

Այսօր Ռուանդայի մայրաքաղաք Կիգալիում Ռուանդայի ցեղասպանության արխիվն է ներկայացվելու: Արխիվն իր մեջ 1994 թ.-ի կոտորածներին վերաբերող տեղեկություններ է պարունակում:

Արխիվի նյութերը հավաքվել են Ռուանդայի լրատվամիջոցներից և թանգարաններից, դատարանի ձայնագրություններից, արտասահմանյան կազմակերպություններից, հատկապես Ֆրանսիայում, և փրկվածներից: Հետագայում ձայնագրությունները և փաստաթղթերը նաև թվային արխիվում կտեղադրվեն և մատչելի կլինեն բոլորին:

Ծրագրի կայացումը վեց տարի է տևել և իրականացվել է բրիտանական «Aegis Trust» կազմակերպության և Կիգալիում «Ցեղասպանության դեմ պայքարի հանձնաժողովի» կողմից:

Ռուանդայում  «Aegis Trust»-ի տնօրեն Ֆրեդի Մութանգուան ասել է. «Այն ցույց կտա փաստեր, թե ինչպես է ցեղասպանությունը նախապատրաստվել և իրականացվել: Մեր նպատակն է պատմել, թե ինչ է եղել և ասել «երբեք նորից»:

Ռուանդայի ցեղասպանության ժամանակ 100 օրում 800.000 մարդ է սպանվել՝ հիմնականում փոքրամասնություն կազմող Տուտսի բնակչությունից: