Ռուսաստանը Սիրիա է տեղափոխել երեք հեռահար ռմբակոծիչ

Ռուսաստանը երեք Տու-22M3 հեռահար ռմբակոծիչ է տեղակայել Սիրիայի Լազքիյե նահանգի Հմեյմիմ ավիաբազայում: ՌԴ ՊՆ-ի հաղորդմամբ՝ այս տեսակի ինքնաթիռներն առաջին անգամ են տեղակայվում ռուսական Հմեյմիմ ավիաբազայում:

Նախարարությունը հայտնում է, որ հեռահար ռմբակոծիչների անձնակազմը գործնական հմտություններ ձեռք կբերի նոր աշխարհագրական տարածքներում ուսումնական առաջադրանքներ վարելու համար`Միջերկրական ծովի օդային տարածքում թռիչքների ժամանակ: Միջերկրածովյան գոտու օդային տարածքի յուրացման ուսումնական առաջադրանքներն ավարտելուց հետո հեռահար ռմբակոծիչները կվերադառնան Ռուսաստանի Դաշնության տարածքում գտնվող մշտական օդանավակայաններ։

Բացի դրանից՝ Ռուսաստանի Դաշնության պաշտպանության նախարարությունը հայտնել է բազայում երկրորդ թռիչքուղու պատրաստ լինելու մասին: Այսպիսով՝ բազան կկարողանա ընդունել տարբեր տեսակի ինքնաթիռներ: