«ԱԱԾ պահեստազորի սպաների միությունը» հայտարարել է, թե որ քաղաքական ուժին կարող է սատարել

«ԱԱԾ պահեստազորի սպաների միությունը» հայտարարությամբ է հանդես եկել՝ ներկայացնելով օրենսդրական փոփոխությունների օրինակներ, որոնք հանգեցրին ԱԱԾ թուլացմանը։

«Մեր դիրքորոշումները հրապարակային արտահայտելիս արդեն հայտնել ենք, որ Ազգային անվտանգության ծառայությունը, որպես պետության առջև առկա մարտահրավերների դիմագրավման երաշխավոր, պիտի ղեկավարի ԱԱԾ համակարգում մասնագիտական մկրտություն ստացած, տարիների ծառայությունում թրծված, համակարգի բոլոր նրբություններին տիրապետող սպա։

Մինչև 2008 թվականի մայիսի 22-ին ընդունված՝ «Ազգային անվտանգության մարմիններում ծառայության մասին» ՀՀ օրենքում փոփոխություններ և լրացոմ կատարելու մասին» օրենքի ուժի մեջ մտնելը գործող կարգավորումներով՝ պետական լիազոր մարմնի ղեկավար կարող էր նշանակվել ազգային անվտանգության մարմինների այն ծառայողը, ով մինչև նշանակումը զբաղեցրել էր ազգային անվտանգության մարմինների ծառայողների բարձրագույն խմբի պաշտոն կամ վերջին երեք տարին զբաղեցրել էր գլխավոր խմբի պաշտոն և ուներ գնդապետից ոչ ցածր կոչում:

2008 թվականին ընդունված օրենքի փոփոխություններով սահմանվեց նաև, որ Պետական լիազոր մարմնում թափուր պաշտոն առաջանալու դեպքում ծառայության կարող են նշանակվել նաև զինված ուժերի, ոստիկանության, դատական ակտերի հարկադիր կատարման ծառայության, քրեակատարողական ծառայության մարմինների և արդարադատության նախարարության պետական ծառայողներ, դատախազներ, ինչպես նաև Հայաստանի Հանրապետության նախագահի, Հայաստանի Հանրապետության կառավարության, Հայաստանի Հանրապետության վարչապետի կողմից այլ պետական մարմիններում պաշտոնի նշանակված ազգային անվտանգության մարմինների նախկին ծառայողներ, որոնք բավարարում են տվյալ պաշտոնին նշանակվելու համար ազգային անվտանգության մարմինների ծառայողներին ներկայացվող պահանջները»։

Ելնելով երկրում ստեղծված դրությունից՝ գտնում ենք, որ անհրաժեշտ է վերականգնել «Ազգային անվտանգության մարմիններում ծառայության մասին» օրենքում եղած կարգավորումները՝ 2008 թվականի մայիսի 22-ի դրությանը համապատասխան, քանի որ ԱԱԾ աշխատանքների առավել արդյունավետ համակարգման ու ղեկավարման համար անհրաժեշտ է կառույցի ղեկին ունենալ տարիների փորձառություն և նեղ մասնագիտական առատ գիտելիքներ ունեցող սպաների։

Հայտնում ենք, որ խորհրդարանական առաջիկա ընտրություններում մեր կողմից հնարավոր սատարում կարող են ունենալ բացառապես այն քաղաքական ուժերը, որոնց մոտեցումները կհամընկնեն նաև այս խնդրի շուրջ հայտնած մեր դիրքորոշումներին», - ասված է հայտարարությունում։