ԵՄ-ն Ռուսաստանին հորդորել է զորքերը դուրս բերել Ուկրաինայի հետ սահմանից

Եվրամիության կարծիքով՝ իրավիճակը Ռուսաստանի և Ուկրաինայի սահմանին շարունակում է մնալ ծայրաստիճան վտանգավոր, և Ռուսաստանին կոչ է անում զորքերը դուրս բերել սահմանից: Այդ մասին երկուշաբթի հայտնել է ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը ԵՄ արտգործնախարարների բանակցություններից առաջ հղած տեսաուղերձում:

«Մենք կքննարկենք իրավիճակը Ուկրաինայի սահմանին, որտեղ ռուսական զորքերը տեղակայված են դաշտային զորավարժությունների համար: Սա շատ վտանգավոր իրավիճակ է, մենք Ռուսաստանին կոչ ենք անում հետ կանչել իր զորքերը Ուկրաինայի սահմանից,- ասել է նա:- Մենք հրավիրել ենք Ուկրաինայի ԱԳՆ ղեկավար Դմիտրի Կուլեբային, որպեսզի զեկուցի մեր նախարարներին Ռուսաստանի հետ սահմանին տիրող իրավիճակի մասին»։

Հիշեցնենք, որ Ուկրաինան և ՌԴ–ն զորքեր են տեղակայում երկու երկրների սահմանին։ ՆԱՏՕ–ն նույնպես զորքեր է մտցնում տարածաշրջան, սակայն ԵՄ–ն  այս դեպքում կոչ է անում միայն ՌԴ–ին՝ հետ քաշել զորքերը։