Ռուսաստանն Ուկրաինայի հետ սահմանից հետ է քաշում իր ուժերի 2/3-ը. ՆԱՏՕ

Ռուսաստանն Ուկրաինայի հետ սահմանից հետ է քաշել կամ շարունակում է հետ քաշել այնտեղ գտնվող իր զորքերի մոտ 2/3-ը: Այս մասին հայտարարել է ՆԱՏՕ-ի գլխավոր քարտուղար Անդերս ֆոգ Ռասմուսենը «Ռոյթերսի» հետ զրույցում:

Այս ցուցանիշը շատ ավելի բարձր է, քան նախկինում նշում էր ՆԱՏՕ-ն: Մայիսի 28-ին Ռասմուսենն ասել էր, որ ռուս-ուկրաինական սահմանի մոտից հետ են քաշվել հազարավոր ռուս զինվորներ, սակայն դեռևս մնում են տասնյակ հազարավորները:

Ռուսաստանի նախագահ Վլադիմիր Պուտինը երկու շաբաթ առաջ հայտարարել էր, որ ռուսական ուժերը հրաման են ստացել Ուկրաինայի հետ սահմանից հետ քաշվել իրենց մշտական տեղակայման վայրեր: Սակայն ՆԱՏՕ-ի փորձագետները երկար ժամանակ պնդում էին, որ չեն տեսնում հրամանի կատարման որևէ նշան:

Մոտավոր հաշվարկներով` Ռուսաստանն Ուկրաինայի հետ սահմանի մոտ է կենտրոնացրել շուրջ 40 հազար զինծառայողի: