Իսրայելցիները գործարան են կառուցել Ադրբեջանում. իսրայելական ԶԼՄ–ներ

Իսրայելական ռազմարդյունաբերական Meteor Aerospace ընկերությունը համատեղ ձեռնարկություն է հիմնել Ադրբեջանում՝ Կասպյան նավաշինական ընկերության հետ: Այդ մասին գրում է իսրայելական Israel Defense պարբերականը:

Համաձայն տեղեկատվության՝ համատեղ ձեռնարկությունը ստեղծվել է «Ադրբեջանի ազգային շահերն ապահովելու և պաշտպանության ոլորտում առաջատար լուծումներ գտնելու նպատակով»:

Meteor Aerospace-ը հայտնում է, որ Ադրբեջանում ստեղծվել է Caspian Meteor համատեղ ձեռնարկությունը՝ ոլորտում համագործակցությունն ընդլայնելու համար:

«Բաքվի նավաշինություն» ՍՊԸ-ն իսրայելական ընկերությունների հետ համատեղ արդեն սկսել է ռազմանավեր կառուցել:

Meteor Aerospace-ը հայտնի է պաշտպանության լայն համակարգերով, ներառյալ՝ խոշոր անօդաչու թռչող սարքերը` առավելագույն թռիչքային կշռով՝  1400/700 կգ, ինչպես նաև տարատեսակ ռազմական տեխնիկաներ։

Ընկերությունը հիմնադրվել է 2013 թվականին Իցհակ Նիսանի կողմից: Նա նախկինում եղել է Israel Aerospace Industries-ի գործադիր տնօրեն և նախագահը, ավելի քան 30 տարվա փորձ ունի Իսրայելի և միջազգային պաշտպանական ու օդատիեզերական շուկաներում: Մասնավորապես՝ Նիսանը վերահսկում էր խոշոր համակարգերի ստեղծումը, զարգացումը և իրացումը, ներառյալ՝ հարձակողական և պաշտպանական հրթիռները, ինքնաթիռները, արբանյակները, բալիստիկ հրթիռներ որսացող սարքերը և ռադարները: