Թուրքիան հայտարարել է սեփական հակահրթիռային համակարգի մշակման մասին

Թուրքիան կարագացնի աշխատանքները, որոնք ուղղված են հակահրթիռային պաշտպանության սեփական համակարգի ստեղծմանը. փետրվարի 24-ին հայտարարել է Roketsan ռազմարդյունաբերական ընկերության ղեկավար Ֆարուք Յիղիթը:

Ըստ նրա՝ այժմ ընկերության հիմնական խնդիրն է կրճատել արտաքին մատակարարներից կախվածությունը հրթիռային և հակահրթիռային համակարգերի ոլորտում, այնուհետև ստեղծել հակահրթիռներ, որոնք ունակ կլինեն խոցել բալիստիկ թիրախները:

«Բացի մեր «Հիսար» և «Սիփեր» հակաօդային պաշտպանության համակարգերից, մենք կարագացնենք հակահրթիռային պաշտպանության համակարգերի տեխնոլոգիաների նախագծման և զարգացման հետազոտությունները, որոնք կարող են խոցել բալիստիկ հրթիռների»,- ասել է Ֆարուկ Յիղիթը:

Ավելի վաղ Թուրքիան փորձել էր ստեղծել երկրի հակահրթիռային պաշտպանության համակարգ՝ կիրառելով ամերիկյան Patriot զենիթահրթիռային համակարգերը:

Այն բանից հետո, երբ Վաշինգտոնը մի քանի անգամ հրաժարվեց այդ համակարգերը Անկարային մատակարարելուց, Թուրքիայի իշխանությունները սկսեցին բանակցություններ վարել Ռուսաստանի հետ Ս-400 հակաօդային պաշտպանության համակարգը գնելու շուրջ: