Թուրքիայում իշխող կուսակցությունը ընտրական շեմն իջեցնելու մասին օրենք է մշակում

Թուրքիայում իշխող «Արդարություն և զարգացում» կուսակցությունը (AKP) պատրաստում է օրենք ընտրական շեմն իջեցնելու մասին. հաղորդում է Sabah-ը:

Ըստ գործող օրենսդրության, որն ընդունվել է 1980-ի ռազմական հեղաշրջումից հետո, կուսակցությունները խորհրդարան անցնելու համար պետք է հավաքեն ձայների 10%-ը, որը Եվրոպայում ամենաբարձր շեմն է։

Համեմատության համար նշենք, որ ՀՀ–ում ընտրական նվազագույն շեմը 5 տոկոսն է, իսկ կուսակցությունների դաշինքների համար՝ 7 տոկոսը։

Ըստ թուրքական թերթի՝ շեմն իջեցնելը փոքր կուսակցություններին հնարավորություն կտա մասնակցելու ընտրությունների՝ առանց դաշինքներ կազմելու անհրաժեշտության, ինչը կարող է օգուտ տալ ԱԶԿ-ի ծայրահեղական դաշնակցին`«Ազգայնական շարժում» կուսակցությանը (MHP՝ «գորշ գայլերի» քաղաքական միավորումը), որը շուրջ 10% աջակցություն ունի:

Թերթը հիշեցնում է, որ MHP-ն վերջերս կոչ էր անում Քուրդիստանի աշխատավորական կուսակցության (PKK) հետ կապերի համար փակել քրդամետ Ժողովուրդների դեմոկրատական կուսակցությունը (HDP), որը Թուրքիայի խորհրդարանում մեծությամբ երրորդն է: