Թուրքիայի արևելքում քրդերը հարձակվել են թուրքական ռազմաբազայի վրա

Թուրքիայի արևելյան հատվածում՝ Դիարբեքիրի շրջանում,  շարունակվում են բախումները թուրքական բանակի օբյեկտների շրջակայքում. հունվարի 11-ին հաղորդել է Թուրքիայի ՆԳՆ մամուլի ծառայությունը:

Նախարարության տվյալներով՝ Քուրդիստանի աշխատավորական կուսակցության (PKK) զինյալները հարձակվել են թուրքական բանակի մի քանի թիրախների վրա: Նշված չէ, թե որ օբյեկտների վրա են հարձակվել, բայց հայտնի է, որ Դիարբեքիրում տեղակայված են Թուրքիայի օդուժի հրամանատարության 2-րդ, 8-րդ կործանիչ և 7-րդ ուղղաթիռային ավիախմբի շտաբները:

Այս պահին հայտնի է, որ մարտերի ընթացքում սպանվել է թուրքական ժանդարմերիայի սպա, վիրավորվել է անվտանգության 4 ծառայող:

Ըստ որոշ հաղորդագրությունների՝ Լիջե բնակավայրի տարածքում կրակոցները շարունակվել են հունվարի 9-ի երեկոյան ժամերից:

Ժանդարմերիայի լրացուցիչ ուժեր են տեղակայվում Դիարբեքիրի տարածքում:

Թուրքիայի պաշտպանության նախարարությունը դեռ չի մեկնաբանել այս տեղեկատվությունը: