Ղարաբաղում ռուսական խաղաղապահ ուժերի ինժեներական ստորաբաժանումները շարունակում են տեղանքի ականազերծման աշխատանքները

Ռուսաստանի պաշտպանության նախարարության հակաականային միջազգային կենտրոնի մասնագետները շարունակում են Լեռնային Ղարաբաղի տարածքի ականազերծման աշխատանքները. հայտնում են ՌԴ պաշտպանության նախարարությունից:

Ստեփանակերտի արվարձանների ականազերծման եւ մաքրման ընթացքում ռուս խաղաղապահները կիրառում են «Ուրան-6» ժամանակակից ռոբոտատեխնիկական համալիրներ, որոնք թույլ են տալիս զինծառայողների անվտանգությունն ապահովել պայթյունավտանգ աշխատանքներ կատարելիս եւ ցանկացած եղանակային պայմաններում պահպանել տեղանքի մաքրման բարձր տեմպը:

2020 թվականի նոյեմբերի 23-ից ռուսական խաղաղապահ ուժերի ինժեներական ստորաբաժանումների կողմից գործողությունների անցկացման ժամանակ չպայթած ռազմամթերքից մաքրվել է մոտ 479,2 հա տարածք, 182,8 կմ ճանապարհ, 710 շինություն, այդ թվում՝ 22 սոցիալական նշանակության օբյեկտ, հայտնաբերվել եւ վնասազերծվել է ավելի քան 23 հազար պայթյունավտանգ առարկա:

Հայտնաբերված պայթյունավտանգ առարկաները եւ չգործած ռազմամթերքը դուրս են բերվում եւ ոչնչացվում հատուկ սարքավորված հրաձգարանում: Այն ռազմամթերքը, որն անհնար է տարհանել, ոչնչացվում է տեղում՝ պայթեցման աշխատանքները կատարելիս ապահովելով անվտանգության բոլոր անհրաժեշտ միջոցները: