Կապիտոլիումի անկարգություններից հետո ԱՄՆ-ում սպասվում է COVID-19-ի նոր բռնկում

ԱՄՆ-ի Հիվանդությունների վերահսկման եւ կանխարգելման կենտրոնի ղեկավար Ռոբերտ Ռեդֆիլդը հայտարարել է, որ Կապիտոլիումի դեպքերն, ամենայն հավանականությամբ, ամբողջ երկրում կորոնավիրուսի նոր բռնկման պատճառ կդառնան:

«Կարծում եմ՝ պետք է ակնկալել, որ սա կհանգեցնի մեկ այլ ալիքի: Առանց դիմակների մարդիկ շրջում էին Կապիտոլիումի տարածքում՝ չպահպանելով հեռավորություն, hետո այդ մարդիկ տուն են գնում ավտոմեքենաներով, գնացքներով և ինքնաթիռներով երկրի ամբողջ տարածքում: Այնպես որ, կարծում եմ՝ սա իրադարձություն է, որը, ամենայն հավանականությամբ, կհանգեցնի կորոնավիրուսի էական տարածման»,-ասել է նա:

Հիշեցնենք, որ չորեքշաբթի ԱՄՆ-ի գործող նախագահ Դոնալդ Թրամփի կողմնակիցները, որոնք Վաշինգտոնում հավաքվել էին նրա աջակցության ցույցին, գրոհել են Կոնգրեսի շենքը՝ ընդհատելով նիստը, որը պետք է հաստատեր անցած ընտրությունների արդյունքները: Իրավապահները արցունքաբեր գազ եւ լուսաձայնային նռնակներ են կիրառել։ Վաշինգտոնի ոստիկանության տվյալների համաձայն՝ բողոքի ցույցերի ընթացքում զոհվել է 5 մարդ։