Իտալիան 500 զինվորական կուղարկի Միլան՝ անկարգություններից հետո կարգուկանոն ապահովելու համար

Իտալիայի կառավարությունը 500 զինվորական կուղարկի Միլան՝ հասարակական կարգն ապահովելու համար։

Ինչպես հաղորդում է «Il Messaggero» թերթը, համապատասխան որոշումը կհաստատվի հոկտեմբերի 20-ին՝ նախարարների խորհրդի արտահերթ նիստում։

Զինվորականները Միլան կուղարկվեն որպես ուժեղացում՝ անցած հանգստյան օրերին քաղաքում տեղի ունեցած անկարգություններից և ջարդերից հետո։

Միայն առևտրի ոլորտին՝ քաղաքի կենտրոնում գտնվող խանութներին ու բարերին, հասցված վնասը գնահատվում է 700 միլիոն եվրո։ 

Հիշեցնենք՝ հոկտեմբերի 16-ին ամբողջ Իտալիայում բողոքի ցույցերի ալիք էր բարձրացել՝ ընդդեմ Ջորջա Մելոնիի կառավարության և նրա վարած քաղաքականության։ Սկզբում դրանք ուսանողական բողոքի ակցիաներ էին։ 

Միլանի անկարգություններից հետո ձերբակալվել է շուրջ 200 մարդ։ Նրանց 80 տոկոսը 12-17 տարեկան անչափահասներ են։