Թուրքիան երկամյա դադարից հետո դեսպան կուղարկի Իսրայել

Երկու տարի ընդմիջումից հետո Թուրքիան նախատեսում է դեսպան նշանակել Իսրայելում և արդեն որոշում է կայացրել դիվանագետի թեկնածության վերաբերյալ: Այս մասին հաղորդում է իրանական անգլալեզու Press TV հեռուստաալիքը՝ հղում կատարելով լրատվամիջոցներին:

Al-Monitor վերլուծական հրատարակությունը ենթադրում է, որ դեսպան կդառնա Թուրքիայի արտաքին գործերի նախարարությանն առընթեր ռազմավարական հետազոտությունների կենտրոնի նախագահ, 40-ամյա Ուֆուք Ուլութաշը, որը ժամանակին սովորել է Եբրայական համալսարանում: «Նա պրոֆեսիոնալ դիվանագետ չէ, բայց շատ խելացի է և պաղեստինամետ,- նշում է Al-Monitor-ի աղբյուրը:

Անկարան հետ էր կանչել իր դեսպանին 2018-ի մայիսին՝ Գազայում Երուսաղեմում ամերիկյան դեսպանատան բացման դեմ բողոքող պաղեստինցի ցուցարարներին սպանելու առիթով: Այնուհետև թուրքերը Անկարայից վտարել էին Իսրայելի դեսպան Էյթան Նաեին և հյուպատոսին, որն աշխատում էր Ստամբուլում:

Թուրքերը և իսրայելցիները համաձայնության եկան հարաբերությունների կարգավորման մասին 2016-ի հունիսին՝ վեց տարի հետո այն դեպքից, երբ 2010 թ. մայիսին Իսրայելի բանակը հարձակվել էր թուրքական նավատորմի վրա, որը (ըստ իսրայելցիների) զենք էր տեղափոխում Գազա: Գործողության արդյունքում սպանվել էր Թուրքիայի 10 քաղաքացի: