Ռուս խաղաղապահներով հինգ ինքնաթիռ է թռել ԼՂ Հանրապետություն

Ռուս խաղաղապահներով առաջին չորս Իլ-76 ինքնաթիռները Ուլյանովսկից ուղեւորվել են Լեռնային Ղարաբաղ: Այս մասին երեքշաբթի հաղորդել է Ռուսաստանի պաշտպանության նախարարությունը. հայտնում է ՏԱՍՍ-ը:

Հաղորդագրությունում, մասնավորապես, ասվում է.  «Լեռնային Ղարաբաղի հակամարտության գոտում առաքելությունների տարածք ռուս խաղաղապահներ տեղափոխող Իլ-76 առաջին չորս ինքնաթիռները օդ են բարձրացել «Ուլյանովսկ-Վոստոչնի» օդանավակայանից: Օդանավերում գտնվում են խաղաղապահ ստորաբաժանման անձնակազմը, տրանսպորտային միջոցներ, զրահամեքենաներ եւ նյութական միջոցներ»:

Ավելի ուշ հայտնի է դարձել հինգերորդ ինքնաթիռի մեկնելու մասին:

Բացի այդ՝ պաշտպանության նախարարությունը հիշեցրել է, որ, ընդհանուր առմամբ, 1960 զինծառայող, 90 զրահամեքենա, 380 միավոր ավտոմեքենա ու հատուկ տեխնիկա կտեղափոխվի Լեռնային Ղարաբաղի հակամարտության գոտում խաղաղապահ զորակազմ տեղակայելու համար: