Ռուս խաղաղապահներով եւս 8 ինքնաթիռ է մեկնել ԼՂ

Ռուսաստանի ռազմատրանսպորտային ավիացիան Ուլյանովսկից ռուս խաղաղապահներով ևս 8 Իլ-76 ինքնաթիռ է ուղարկել Լեռնային Ղարաբաղի հակամարտության գոտի՝ խաղաղապահ օպերացիային մասնակցելու: Այս մասին տեղեկացնում են ՌԴ պաշտպանության նախարարությունից:

Նշվում է՝ ինքնաթիռներում գտնվում են ավելի քան 10՝ բարձր անցանելիություն ունեցող բեռնատար մեքենաներ ու նյութատեխնիկական ապահովության միջոցներ, ինչպես նաև խաղաղապահ ստորաբաժանումների ավելի քան 100 զինծառայող: Նրանք վայրէջք են կատարել Հայաստանի օդանավակայանում, որտեղից ուղևորվել են Լեռնային Ղարաբաղ:

Անցյալ մեկ օրվա ընթացքում Իլ-76-ը 20 թռիչք է իրականացրել. տեղափոխվել է 372 զինծառայող, 53 միավոր ավտոմեքենա ու հատուկ տեխնիկա:

Նշենք՝ խաղաղապահ օպերացիայի անցկացման սկզբից իրականացվել է 56 չվերթ, տեղափոխվել է 817 զինծառայող ու 119 միավոր սպառազինություն և ռազմատեխնիկա, Ռուսաստանի ՕՏՈւ բանակային ավիացիայի Մի-8 եւ Մի-24 ութ ուղղաթիռ: