Վրաստանում ընտրությունների ընթացքում ծեծկռտուքներ են եղել. քրեական 6 գործ է հարուցվել

Վրաստանի ներքին գործերի նախարարությունը քրեական 6 գործ է հարուցել խորհրդարանական ընտրությունների ընթացքում գրանցված խախտումների փաստով: Այս մասին հայտնել է երկրի ներքին գործերի նախարարի տեղակալ Նինո Ցիցիաշվիլին. հաղորդում է «Սպուտնիկ Գրուզիա»-ն:

Նրա խոսքով՝ գործերի մեծ մասը կապված է ծեծկռտուքների հետ: Մասնավորապես` քրեական գործ է հարուցվել «բռնություն» հոդվածով «Միասնական ազգային շարժում» կուսակցության ակտիվիստ Զվիադ Կուպրավային Թբիլիսի Դիդի Դիգոմի միկրոշրջանում` թիվ 40 ընտրատեղամասում, ծեծի ենթարկելու փաստով:

Ոստիկանությունը հետաքննում է նաեւ Քութայիսի քաղաքապետի թեկնածու Իրակլի Կիկվաձեի հայտարարությունը քաղաքի թիվ 13 ընտրատեղամասում մի քանի անձանց կողմից ծեծկռտուքի մասին:

Վրաստանում հոկտեմբերի 31-ին ընտրում են 10-րդ գումարման խորհրդարանի պատգամավորներին: Ընտրություններին մասնակցում է 48 կուսակցություն եւ 2 դաշինք:  Կընտրվի 150 պատգամավոր` 120-ը՝ համամասնական, 30-ը՝ մեծամասնական կարգով: