Էրդողանը Ռուսաստանին մեղադրել է Իդլիբում ընդդիմության ճամբարի վրա հարձակման մեջ

Թուրքիայի նախագահ Ռեջեփ Թայիփ Էրդողանը հայտարարել է, որ Ռուսաստանը «հարձակվել» է սիրիական Իդլիբում գտնվող ընդդիմության ուսումնական ճամբարի վրա. հայտնում է «ՌԻԱ Նովոստի»-ն։

«Իդլիբի շրջանում տեղակայված՝ ընդդիմության ուսումնական ճամբարի վրա ռուսական հարձակումը վկայում է այնտեղ կայուն խաղաղության և հանգստության ցանկության բացակայության մասին»,- ասել է Էրդողանը իշխող «Արդարություն և զարգացում» կուսակցության խորհրդարանական խմբակցության հետ հանդիպման ժամանակ:

Ավելի վաղ սիրիական «Ալ Վաթան» թերթը, վկայակոչելով Իդլիբի առողջապահության նախարարության աղբյուրները, հաղորդել էր, որ Սիրիայի Իդլիբ նահանգում ահաբեկչական խմբավորման ուսումնական ճամբարին Ռուսաստանի օդատիեզերական ուժերի կողմից ավիահարվածի արդյունքում ավելի քան 40 գրոհային է սպանվել և առնվազն 60-ը՝ վիրավորվել:

Արդեն նշել ենք նաև, որ, բացի այս ճամբարների վրա հարձակումներից, ՌԴ ՕՏՈՒ–ն 2 օր առաջ ոչնչացրել էր նաև Թուրքիայի աջակցությունը վայելող «Ֆայլաք ալ Շամ» խմբավորման շտաբը, որը զբաղվում է վարձկանների հավաքագրմամբ։