Երեսփոխան Բագրատունի Կառավարութեան Կազմութեան Մասին Խորհրդակցեցաւ Նախագահ Աունին Հետ

ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի երէկ Պաապտայի մէջ հանդիպում ունեցաւ հանրապետութեան նախագահ զօր. Միշել Աունի հետ` կառավարութեան կազմութեան շուրջ խորհրդակցելու նպատակով:

Հանդիպումին ընթացքին Յ. Բագրատունի հաստատեց, որ նախարարութիւններու հերթափոխութեան մասին ՀՅԴ Կեդրոնական կոմիտէի կեցուածքը սկզբունքային է եւ հինէն եկած է, այսինքն` անպայման շիի համայնքին չի վերաբերիր:

«Նախարարութիւններու հերթափոխութեան մասին մեր կարծիքը նոր չէ. մենք միշտ ալ ըսած ենք, որ նախարարութիւնները համայնքներու սեփականութիւնը չեն: Մեզի համար անընդունելի է նախարարութիւններու որակումը, ինչպէս` ուժային, ծառայութիւններու, երրորդ կամ չորրորդ կարգի նախարարութիւններ: Հետեւաբար, մենք համաձայն ենք նախարարութիւններու հերթափոխութեան», շեշտեց ան:

Երեսփոխան Բագրատունի աւելցուց, որ վարչապետին կողմէ նախարարներու ճշդումին պարագային պէտք է իմանանք, որ ո՛վ են նախարարները: «Վերջին հաշուով երեսփոխանական պլոքներն են, որ կառավարութեան վստահութեան քուէ պիտի շնորհեն: Այսինքն, ինչքան ալ վստահ ըլլանք վարչապետէն, մենք պիտի ուզենք տեղեկութիւն ունենալ նախարարներուն մասին», յայտնեց ան:

ՀՅԴ Կեդրոնական կոմիտէի ներկայացուցիչը նշեց, որ մերժելի է այն գաղափարը, թէ հոս բոլորը պիղծ են, ուրեմն պէտք է դուրսէն նոր նախարարներ ներածել: «Մենք նախարար ներածելու գաղափարին դէմ ենք: Մենք պիտի մասնակցինք կառավարութեան եւ մեզի անծանօթ մարդու քուէ տալու պատրաստ չենք: Եթէ մենք հայ նախարարին անուան շուրջ համաձայն չըլլանք, վստահ չենք, որ կառավարութեան վստահութեան քուէ կը շնորհենք», ընդգծեց Յ. Բագրատունի:

aztagdaily.com