Իրանը համաձայնել է փոխհատուցել խոցված ուկրաինական Boeing-ի համար

«Իրանը համաձայնել է փոխհատուցում վճարել ինքնաթիռի համար, բայց այս գործընթացը տևում է շատ երկար և ունի տարբեր տեխնիկական և իրավական ասպեկտներ», - հայտարարել է Իրանի ԱԳՆ խոսնակ Աբբաս Մուսավին:

Նա բացատրել է, որ փոխհատուցման վճարների հարցի շուրջ բանակցությունները շարունակվում են, և առանձին նշել է, որ Թեհրանը պատասխանատվություն է վերցրել խոցված ինքնաթիռի համար:

Թեհրանից Կիև մեկնած ինքնաթիռը վթարի է ենթարկվել 2020 թվականի հունվարի 8-ին: Օդանավում մահացած բոլոր 176 անձինք՝ Ուկրաինայի, Իրանի, Աֆղանստանի, Կանադայի, Մեծ Բրիտանիայի, Գերմանիայի, Շվեդիայի քաղաքացիներ էին:

Սկզբնապես, Իրանի ավիացիոն իշխանությունները պնդում էին, որ աղետի պատճառ է դարձել ինքնաթիռի շարժիչը:

Երեք օր անց Իրանի իշխանությունները խոստովանեցին, որ սխալմամբ խոցել են ինքնաթիռը. Հակաօդային պաշտպանության համակարգի կառավարողները սխամամբ այն  շփոթել էին հակառակորդի ինքնաթիռի հետ:

Ուկրաինայի նախագահ Վոլոդիմիր Զելենսկին խոստացել էր դիմել միջազգային դատարաններ, եթե Թեհրանը չկատարի իր պարտավորությունները՝ կապված ինքնաթիռի կործանման հետ:

Հուլիսին Իրանի քաղաքացիական ավիացիայի կազմակերպությունը հրապարակեց կատարվածի վերաբերյալ առաջընթացի մասին զեկույց: Այն պարզաբանում է, որ ուղևոր Boeing- ի վրա հարձակման պատճառը եղել է ՀՕՊ համակարգի սխալ կարգավորումը: