Վերջին տարիներին միայն մեկ հրդեհող են բռնել, նա էլ ի վիճակի չի եղել փոխհատուցել 95 մլն դրամի վնասը

Աշնանացանի շրջանն է. գյուղացիներից շատերի մոտ ընդունված է այրել խոզանները, իսկ պատճառները տարբեր են` շատերն ուղղակի չգիտեն` ինչ անել դրանց հետ, իսկ մյուս մասն էլ կարծում է, որ այրումն օգտակար է հողի համար:

Այսօր` լրագրողների հետ հանդիպման ժամանակ, գյուղնախարարության գլխավոր անտառապետ Ռուբեն Պետրոսյանը նշեց, որ հասարակության մեջ խոզաններն այրելու վատ սովորությունը մտել է վերջին 10 տարիներին: Նա հորդորում է` չայրել դրանք, քանի որ դա ոչ միայն օգտակար չէ, քանի որ հումուսն է վերանում, միկրոֆլորան է վնասվում, այլև հրդեհների պատճառ է դառնում:

«Բոլորն անտառահատումների մասին են խոսում, բայց հրդեհներն ավելի շատ են վնասում անտառները: Ցավն այն է, որ մեղավորին գտնելն անհնար է լինում, եթե այդ պահին ականատես չենք լինում: Շատերը չգիտեն, որ խոզանների այրման համար իրենց վարչական տուգանքներ են սպասվում: Վերջին տարիներին միայն մեկ դեպք է եղել, որ բռնել են գյուղացուն` Օձունում էր: Անզգուշության պատճառով հրդեհ էր բռնկվել` 95 մլն դրամի վնաս պատճառելով, բայց գյուղացուն այդքան փող որտեղի՞ց»,- ասաց Պետրոսյանը:

Նա նշեց նաև, որ հիմա իրենք 3 արագ արձագանքման խումբ ունեն, որոնց աշխատանքի շնորհիվ, օրինակ, Սյունիքում զգալիորեն նվազել է հրդեհների թիվը: Ըստ Պետրոսյանի` անհրաժեշտ է, որ յուրաքանչյուր անտառածածկ տարածքում երկու նման խումբ գործի: Ի դեպ, մեկ խումբ կազմելու և տեխնիկական միջոցներով ապահովելու համար 30-40 հազար դոլար է անհրաժեշտ: