Չինաստանը ԱՄՆ-ին կպատասխանի պատժամիջոցներով Տիբեթի հարցում ոչ պատշաճ պահվածքի համար

Չինաստանը անցագրային սահմանափակումներ կսահմանի ԱՄՆ քաղաքացիների համար ՉԺՀ Տիբեթի ինքնավար շրջանի նկատմամբ «անվայել պահվածքի» համար: Այդ մասին այսօր` հուլիսի 8–ին, հայտարարել է Չինաստանի ԱԳՆ պաշտոնական ներկայացուցիչ Չժաո Լիցզյանը` մեկնաբանելով  Չինաստանի` Տիբեթի մուտքը օտարերկրացիների համար սահմանափակող պաշտոնյաների նկատմամբ ամերիկյան սահմանափակումները. տեղեկացնում է Yerkir.am-ը` «Սինհուա» գործակալությանը հղումով:

«Մենք մեր վճռական բողոքն ենք հայտնում այդ կապակցությամբ: Ի պատասխան այդ քայլերի` Չինաստանը որոշել է անցագրային սահմանափակումներ սահմանել ԱՄՆ քաղաքացիների նկատմամբ, որոնք այդպիսի անվայել պահվածք են դրսևորում Տիբեթի նկատմամբ»,- հայտարարել է նա:

ԱՄՆ-ը նոր հակաչինական պատժամիջոցներ է կիրառում` 2018 թվականի «Տիբեթ փոխադարձ հասանելի մուտքի մասին» օրենքին համապատասխան: ԱՄՆ պետաքարտուղար Մայք Պոմպեոյի խոսքով` Չինաստանը շարունակում է  խոչընդոտել ամերիկացի դիվանագետների և այլ պաշտոնական անձանց, լրագրողների ու զբոսաշրջիկների այցերին Տիբեթի ինքնավար շրջան ու տիբեթական այլ շրջաններ:

«Տիբեթական շրջաններին հասանելիությունը կենսական շատ ավելի կարևոր նշանակություն է ստանում տարածաշրջանային կայունության առումով` հաշվի առնելով այնտեղ մարդու իրավունքների խախտումները, նաև Պեկինի անկարողությունը կանխել Ասիայի խոշորագույն գետերի ակունքների մոտակայքում շրջակա միջավայրի վիճակի վատթարացումը»,- հայտարարել է Պոմպեոն: