Մենք թույլ չենք տա, որ Թուրքիան սպառնա ԵՄ-ին. Ավստրիայի վարչապետ

Ավստրիայի վարչապետ Սեբաստիան Կուրցը հունական Kathimerini թերթին տված հարցազրույցում անդրադարձել է փախստականների խնդրին, ինչի պատճառով վերջերս սրվել է թուրք-հունական հարաբերությունները: Կուրցը նշել է, որ ԵՄ-ն թույլ չի տա Թուրքիային շանտաժի ենթարկել նրանց:

«Մենք թույլ չենք տա, որ Թուրքիան սպառնա ԵՄ-ին՝ փախստականներին օգտագործելով: Նրանք փորձում են դա անել կրկին ու կրկին: Մարտին մենք օգնություն ուղարկեցինք Մարիցայի շրջան՝ Հունաստանը և ԵՄ-ն պաշտպանելու համար», - ասաց նա:

Ավստրիայի վարչապետը նշել է, որ օգնության նպատակը հստակ ազդանշան ուղարկելն էր Թուրքիային:

Հիշեցնենք, որ 2020-ին, Սիրիայի Իդլիբ նահանգում տեղի ունեցող զարգացումների ֆոնին, փետրվարի վերջին Թուրքիան փախստականների առաջ բացեց իր «դարպասը» դեպի Եվրոպա:

Թուրքական իշխանությունների որոշումից անմիջապես հետո Թուրքիայում բնակվող տասնյակ հազարավոր ապօրինի ներգաղթյալներ սկսեցին տեղափոխվել թուրք-հունական և թուրք-բուլղարական սահմաններ: