Հելսինկիի նարկոոստիկանության նախկին ղեկավարին դատում են թուրքի սպանության համար

Ֆինլանդիայի  մայրաքաղաքի շրջանային դատարանում սկսվել է Հելսինկիի նարկոոստիկանության նախկին ղեկավար Յարի Աարնիոյի գործի քննությունը: Նրան մեղադրում են սպանության աջակցելու մեջ. ըստ yerkir.am-ի` հայտնում է ֆիննական Yle պարբերականը:

Մեղադրականում նշվում է, որ Աարնիոն իմացել է պատվիրված սպանության նախապատրաստության մասին, սակայն ոչինչ չի ձեռնարկել այն կանխելու համար: Խոսքը 2003 թվակաին Հելսինկիում  Շվեդիայի` ազգությամբ թուրք քաղաքացի Վոլքան Յունսալի սպանության մասին է:

Ոստիկանության վարկածով` հանցագործները միմյանց հետ հարաբերություններ էին պարզել. Յունսալն իր ընկերոջից գողացել էր 2002-ին Ստոկհոլմի օդանավակայանում թալանված փողերի մի մասը: Ավելի ուշ նա մատնել էր հանցակիցներին ու հայտնվել վկաների պաշտպանության ծրագրում, սակայն հետո հրաժարվել էր պաշտպանությունից:

Մեղադրյալների աթոռին է նաև հանցավոր խմբի նախկին պարագլուխ Կեյո Վիլհունենը: Ըստ մեղադրանքի` նա սպանությունը կատարողներից է:

Ինչպես Աարնիոն, այնպես էլ Վիլհունենը չեն ընդունում իրենց մեղքը: Աարնիոյի խոսքով` իրեն ինչ-որ լուրեր հասել էին, որոնք, սակայն, հնարավոր չէր եղել հաստատել, ինքն էլ ոչ մի բան չի իմացել սպանության կազմակերպման մասին: Վիլհունենը հայտարարում է, որ իրեն դավել են, դա վրեժ է այն մարդկանց կողմից, որոնք արդեն բանտում են այդ հանցագործության համար:

Այդ գործով ցմահ բանտարկված է չորս մարդ: Գործը վերաբացվել է, քանի որ նրանցից երկուսը նոր մանրամասներ են պատմել հանցագործության մասին:

Ներկայումս Աարնիոն բանտարկված է: 2016-ի դեկտեմբերին դատարանը նրան դատապարտել է 13 տարվա ազատազրկման թմրանյութերի հետ կապված վեց ծանր հանցագործությունների, նաև օրենքի այլ` 16 խախտման համար: Հիմա դատախազը պահանջում է նրան ցմահ դատապարտել սպանությանը հանցակից լինելու համար: