Չինաստանը կոչ է արել հարգել Պաղեստինի դիրքորոշումը

Պաղեստինի դիրքորոշումը անհրաժեշտ է հարգել իսրայելա-պաղեստինյան հակամարտության լուծման վերաբերյալ. այս մասին հայտարարել է Չինաստանի ԱԳՆ պաշտոնական ներկայացուցիչ Չժաո Լիցզյանը. հայտնում է «ՌԻԱ Նովոստին»։

Հիշեցնենք, որ Պաղեստինի ղեկավար Մահմուդ Աբբասը հայտարարել էր, որ Պաղեստինը որոշել է չեղյալ հայտարարել Իսրայելի և ԱՄՆ-ի հետ ձեեք բերված բոլոր պայմանավորվածությունները՝ Իսրայելի կողմից պաղեստինյան հողերը բռնազավթելու մտադրության ֆոնին։

«Չինաստանը միշտ համարել է, որ ՄԱԿ-ի ԱԽ համապատասխան բանաձևերը և երկու պետությունների ծրագիրը հիմք են ստեղծել լուծելու հակամարտությունը, որը պետք է հարգվի։ Անհրաժեշտ է լսել և հարգել Պաղեստինի դիրքորոշումը», - նշել է Լիցզյանը։

Նշենք, որ որպես իսրայելա-պաղեստինյան հակամարտության կարգավորման քայլ, Պաղեստինը պահանջում է վերականգնել մինչև 1967 թվականը գործած սահմանագծերը։ Իսրայելը հրաժարվում է այդ առաջարկից, և ավելին, հրաժարվում է կիսել Երուսաղեմը արաբների հետ՝ այն հռչակելով Իսրայելի մայրաքաղաք։