Մերկելը Թուրքիայում կոչ է արել հարգել մամուլի և քաղաքական ազատությունները

Երեկ Թուրքիա այցելած Անգելա Մերկելը հանդիպել է երկրի նախագահ Ռեջեփ Թայիփ Էրդողանի հետ:

Ըստ Hurriyet-ի՝ հանդիպումից հետո կողմերը մամուլի ասուլիսով են հանդես եկել: Էրդողանը հայտարարել է, որ հանդիպման ընթացքում քննարկել են երկկողմանի հարաբերությունները, ԵՄ անդամակցության հարցն ու գաղթականների խնդրին առնչվող մի շարք հարցեր: Չեն շրջանցվել նաև Էգեյան ծովում տեղի ունեցած վերջին զարգացումները, տարածաշրջանի իրավիճակ, մասնավորապես` Սիրիայում և Իրաքում:

Մերկելն ընդգծել է, որ սա իր առաջին այցն է Թուրքիա՝  ռազմական հեղաշրջման փորձից հետո: Նա կարևորել է հեղաշրջման փորձի պատասխանատուներին պատժի ենթարկելու հարցը, սակայն միաժամանակ ընդգծել, որ պետք է հարգել մամուլի և քաղաքական ազատությունները:

Անդրադառնալով գաղթականների հարցով Թուրքիա-ԵՄ համաձայնագրի կնքմանը՝  կանցլերը շեշտել է, որ այն բխում է երկու կողմերի շահերից:

Հիշեցնենք, որ Մերկելն Անկարայում հանդիպել է քրդամետ Ժողովուրդների դեմոկրատական կուսակցության ներկայացուցիչների հետ, որի համանախագահներն ու մի շարք պատգամավորներ գտնվում են կալանքի տակ: