Ռուսական նավթի գինն առավելագույն ցուցանիշի է մարտից ի վեր. ավելի քան 30 դոլար՝ մեկ բարելի դիմաց

Ռուսական Urals ապրանքանիշի նավթը Եվրոպայում շարունակում է թանկանալ. անցյալ շաբաթվա վերջին մարտի կեսերից ի վեր առաջին անգամ նավթի գինը գերազանցել է 30 դոլարը՝ մեկ բարելի դիմաց։ Այս մասին գրում է ՌԻԱ «Նովոստի»-ն՝ նշելով, որ նավթի համաշխարհային գործակիցները շարունակում են թանկանալ ՕՊԵԿ+ ձևաչափի երկրների համաձայնագրի ուժի մեջ մտնելու, ինչպես նաև մերձավորարևելյան մատակարարների կողմից արդյունահանման ծավալների կրճատման շնորհիվ. հայտնում է Yerkir.am-ը։

Բացի այդ՝ նավթի և նավթամթերքի պահանջարկը սկսում է վերականգնվել բազմաթիվ երկրներում կարանտինային միջոցառումների թուլացման ֆոնին:

Հավելվում է՝ Հյուսիսարևմտյան Եվրոպայում ուրբաթ Urals-ի նավթի գինը թանկացել է 1.49 դոլարով՝ մեկ բարելի դիմաց կազմելով 30.44 դոլար: Միջերկրածովյան տարածաշրջանում այս ապրանքանիշի նավթի գինը նույնքանով թանկացել է՝ այդպիսով հասնելով 31.84 դոլարի: