Համավարակի գագաթնակետը նույնիսկ չի երևում, պատվաստանյութ է անհրաժեշտ. ԱՀԿ

Covid-19-ով վարակման 90 տոկոսը բաժին է ընկնում ԱՄՆ-ին ու Եվրոպային: Համավարակի գագաթնակետը նույնիսկ չի երևում. ըստ yerkir.am-ի` այսօր` ապրիլի 14-ին, հայտարարել է Առողջապահության համաշխարհային կազմակերպության պաշտոնական ներկայացուցիչ Մարգարետ Հարիսը:

Նա ընդգծել է, որ Եվրոպայում «խառը պատկեր է». Իտալիայում և Իսպանիայում, որտեղ կորոնավիրուսի խոշորագույն համաճարակներն են, նկատվում է վարակի նվազման միտում, մինչդեռ Թուրքիայում և Մեծ Բրիտանիայում վարակվածների թիվն աճում է:

Առողջապահության համաշխարհային կազմակերպության ղեկավար Թեդրոս Գեբրեյեսուսի կարծիքով` կորոնավիրուսի տարածման լիակատար կասեցման համար հարկավոր է պատվաստանյութ, այլապես հնարավոր է համաճարակի նոր ալիք: Ըստ նրա` կարանտինային միջոցառումներն էլ հարկավոր է չեղարկել հետզհետե` պահպանելով վերահսկողությունը: