Թրամփի բժշկի կարծիքով՝ նախագահը կորոնավիրուսի ստուգման անհրաժեշտություն չունի

ԱՄՆ նախագահ Դոնալդ Թրամփի անձնական բժիշկ Շոն Քոնլին հայտնել է, որ նախագահը կորոնավիրուսի ստուգման անհրաժեշտություն չունի. տեղեկացնում yerkir.am-ը` ՌԻԱ «Նովոստի»-ին հղումով:

«Հաշվի առնելով, որ նախագահի մոտ ախտանշաններ չկան, այս պահին COVID-19-ի անալիզ անցկացնելը ցուցված չէ»,- ասվում է Քոնլիի հուշագրում, որը տարածել է Սպիտակ տունը:

Անցյալ շաբաթ բրազիլական պատվիրակության հետ հանդիպման ժամանակ Թրամփը կարճատև շփում է ունեցել մարդու հետ, որի մոտ 3 օր անց վիրուսի ախտանշաններ են ի հայտ եկել: Նրանից բացի՝ Թրամփը նույն սեղանի շուրջն է եղել մեկ այլ հյուրի հետ, որը, հետագայում պարզվել է, նույնպես վարակված է:

Ավելի վաղ Թրամփը բազմիցս հայտարարել էր, որ իրեն լավ է զգում և չի պատրաստվում կորոնավիրուսի հետազոտություն անցնել: Սակայն ուրբաթ կայացած մամուլի ասուլիսում նա ասել էր, որ ինչ-որ պահի, ամենայն հավանականությամբ, իրեն ևս կստուգեն COVID-19 թեստով: