Վճարվիր վարակվելու դիմաց. հետազոտողները կամավորներ են փնտրում կորոնավիրուսի դեմ պատվանյութի փորձարկման համար

Բրիտանացի գիտնականները նոր կորոնավիրուսի պատվաստանյութի մշակման նպատակով հիվանդությամբ վարակվելու համար կամավորներին գումար են առաջարկում. հայտնում է Yerkir.am-ը՝ Daily Mail-ին հղումով:

Ըստ պարբերականի՝ պատվաստանյութի փնտրտուքներով զբաղվում է «Hvivo» ընկերությունը. նրան է պատկանում  Լոնդոնի Queen Mary BioEnterprises նորարարական կենտրոնի լաբորատորիան։

Հայտարարությունում մանրամասնվում է՝ փորձագետները 24 կամավորի 4500-ական ԱՄՆ դոլար (3.500 ֆունտ սթերլինգ) են առաջարկում կորոնավիրուսակիր դառնալու դիմաց։ Կամավորներին կներարկեն 0C43 և 229E առավել նվազ վտանգավորության վիրուսներ,  այնուհետև 14–օրյա կարանտին կսահմանեն նրանց համար։

Ողջ ընթացքում հետազոտողները կհետևեն հիվանդների վիճակին: Փորձարկված պատվաստանյութերից և դեղերից ամենաարդյունավետները հետագայում կկիրառվեն կորոնավիրուսով վարակված հիվանդների բուժման նպատակով:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին:

Մարտի 10-ի ժամը 09.33-ի դրությամբ ողջ աշխարհում հաստատվել է կորոնավիրուսով վարակման 114.448 դեպք, որից 4026-ը՝ մահվան, և 64.156-ը՝ առողջացման:

Հիշեցնենք՝ Եվրոպայում ավելի քան 9000 հայտաբերված վարակակիր կա, որից 2/3-ը բաժին է ընկնում Իտալիային, վարակման ավելի քան 700-ական դեպքեր են գրանցվել Ֆրանսիայում և Գերմանիայում։ Առաջին անգամ կորոնավիրուս է հայտնաբերվել նաև Մոլդովայում։

Հայաստանում այս պահին կորոնավիրուսի հաստատված 1 դեպք կա: Տղամարդը Երևան էր ժամանել Թեհրանից: Այս պահին նա և օդանավում եղած մնացյալ 30 անձինք գտնվում են կարանտինում՝ Ծաղկաձորի «Գոլդեն Փելիս» հյուրանոցային համալիրում: Նրանք իրենց լավ են զգում: