Պոմպեոն Իսրայելում է. կքննարկվեն Իրանին և կորոնավիրուսին առնչվող հարցեր

ԱՄՆ պետքարտուղար Մայք Պոմպեոն չորեքշաբթի առավոտյան ժամանել է Իսրայել. այս մասին նա տեղեկացրել է իր թվիթերյան էջում:

«Ուրախ էի՝ լինել Իսրայելում՝ համակարգելու Նեթանյահուի և Գանցի՝ երկու առանցքային սպառնալիքների դեմ պայքարին ուղղված գործողությունները»,- ասել է Պոմպեոն՝ պարզաբանելով, որ այդ երկու սպառնալիքներն են Իրանն ու կորոնավիրուսը։

Միևնույն ժամանակ նա նաև նշել է, որ Իսրայելն ու ԱՄՆ-ն այդ մարտահրավերների դեմ դուրս կգան ուս-ուսի տված:

Հիշեցնենք՝ վերջին երկու ամիսներին սա Պոմպեոյի առաջին գործուղումն է արտերկիր: Նախատեսվում է, որ նա Երուսաղեմում առանձին հանդիպումներ կունենա Իսրայելի վարչապետ Բենյամին Նեթանյահուի և Քնեսեթի խոսնակ Բենի Գանցի հետ: