Դրախտիկ գյուղի դպրոցում ձմռան նախաշեմին պատուհաններ չկան`սա մեր կրթական համակարգի ամբողջական պատկերն է. Արայիկ Հարությունյանի արձագանքը

Դրախտիկ գյուղի դպրոցի աղետալի վիճակը, որտեղ ձմռան նախաշեմին պատուհաններ չկան ու որտեղ 150-ից ավել աշակերտ սառում են՝ դա միայն այդ դպրոցի պատկերը չէ, դա մեր կրթական համակարգի իրական ամբողջական պատկերն է` ըստ Yerkir.am-ի այս մասին ահազանգել է Դավիթ Ֆիդանյանը:

ՙՙՍա նաև ցույց է տալիս իրական վերաբերմունքը կրթության հանդեպ: Վստահ եմ, որ Դրախտիկի դպրոցը միակը չէ, որը այսպիսի աղետալի պայմաններում է: 21-րդ դարն է իսկ Հայաստանի շատ համայնքների դպրոցներում ամենակենցաղային տարրական պայմանները չեն ապահովված: Հետո էլ խոսում ենք հասարակության շրջանում ցածր կրթական ցենզի մասին: Եթե անգամ ամենատարրական պայմանները դպրոցներում չեն ապահովում, էլ ի՞նչ բարձր որակի կրթության մասին կարող ենք խոսել: Ո՞ր մի ուսուցիչը այդպիսի պայմաններում հաճույքով կաշխատի: Կամ ո՞ր մի աշակերտը այդպիսի պայմաններում կմտածի, որպեսզի ավելի շատ գիտելիք ստանա: Պատկան մարմինները ուղղակիորեն պարտավոր են լուծել ոչ միայն Դրախտիկ համայնքի դպրոցի վերանորոգման հարցը, այլև բոլոր այն դպրոցների, որոնք գտնվում են նմանատիպ վիճակում՚՚,-ահազանգել է Ֆիդանյանը:

ԿԳՄՍ նախարար Արայիկ Հարությունյանն օպերատիվ արձագանքել է, բայց լուծում առաջադրելու փոխարեն, սովորության համաձայն մեղադրել է նախորդ իշխանություններին:

ՙՙԵս գիտեմ այդ խնդրի մասին, անձամբ եմ եղել այդ դպրոցում: Մենք այսպիսի դպրոցներ հարյուրներով ժառանգություն ենք ստացել նախորդներից: Սա մեկ միլիոն, երկու միլիոն, քսան միլիոն և նույնիսկ հարյուր միլիոն դրամի խնդիր չէ: Դպրոցները վերակառուցելու ու վերանորոգելու համար մեզ անհրաժեշտ են հարյուրավոր միլիոն դոլարներ:

Գիտեք, որ անցած մեկ ու կես տարում տասնյակ դպրոցներում սկսվել են վերանորոգումներն ու վերակառուցումները, շուտով, որպես տարվա ամփոփում, համապարփակ տվյալներ կներկայացնենք: Միայն հաջորդ տարի մեր բյուջեով կապիտալ ծախսերը չորս անգամ ավելացել են: Հերթով բոլոր դպրոցները վերակառուցելու ու վերանորոգելու ենք: Մեզ պարզապես ժամանակ է պետք: