Լիբանանի 3 կուսակցությունները կոնսենսուսի են հասել նոր վարչապետի թեկնածության հարցում

Լիբանանյան երեք խոշոր կուսակցությունները համաձայնության են եկել ֆինանսների նախկին նախարար Մոհամմադ Սաֆադիին վարչապետի պաշտոնի թեկնածու առաջադրելու հարցում. ըստ Yerkir.am-ի՝ հայտնում է Reuters-ը՝ իրավիճակին ծանոթ 3 աղբյուրի հղումով:

Սա վկայում է սուր տնտեսական ճգնաժամի ժամանակ նոր կառավարության ձեւավորման գործում առաջընթացի մասին:

Սաադ ալ Հարիրին վարչապետի պաշտոնից հրաժարական է ներկայացրել հոկտեմբերի 29-ին իշխող քաղաքական գործիչների դեմ բողոքի ցույցերի աննախադեպ ալիքից հետո, որոնց մեղադրում են կոռուպցիայի մեջ:

Սաֆադիի թեկնածության վերաբերյալ կոնսենսուսի են եկել նախօրեին երեկոյան սուննի առաջատատար քաղաքական գործիչ Հարիրիի և «Հըզբոլլահ»-ի ու նրա դաշնակից «Ամալի»-ի ներկայացուցիչների հանդիպման ընթացքում:

75-ամյա Սաֆադին հայտնի գործարար է, միևնույն ժամանակ սուննի քաղաք համարվող Տրիպոլիից ընտրված՝ խորհրդարանի նախկին անդամ: Ավելի վաղ նա զբաղեցրել է ֆինանսների և էկոնոմիկայի ու առևտրի նախարարների պաշտոնները:

Իշխանության տարանջատման համակարգի համաձայն՝ Լիբանանի վարչապետը պետք է լինի սուննի մուսուլման: