ՀՀԿ-ն մինչև ապրիլ ամիս չի պատրաստվում քննարկել ՀՀ վարչապետի թեկնածության հարցը. Շարմազանով

Այսօր տեղի է ունեցել ՀՀԿ ԳՄ հերթական նիստը, որի ավարտից հետո ՀՀԿ խոսնակ Էդուարդ Շարմազանովը լրագրողների հետ զրույցում նշեց, որ նիստի ընթացքում քննարկվել են արտաքին, ներքին քաղաքական հարցեր: Լրագրողների հարցին, արդյո՞ք քննարկվել է ՀՀ հաջորդ վարչապետի թեկնածության հարցը, Շարմազանովը նշեց, որ ՀՀԿ-ն մինչև ապրիլ ամիս չի պատրաստվում քննարկել ՀՀ վարչապետի թեկնածության հարցը:

«Երբ գա ժամանակը` ապրիլը, մենք կքննարկենք այդ հարցը: Մամուլին կհորդորեմ ձեռնպահ մնալ գնահատականներ հնչեցնելուց, քանի որ այդ հարցը դեռ չի քննարկվել: Կուսակցությունը հաշվի առնելով ՀՀ քաղաքացու, ազգային ու պետական շահը, կառաջադրի այն թեկնածուին, ով ըստ մեզ ու ըստ ՀՀ քաղաքացիների, կարող է լավագույնս իրականացնել գործադիրի պարտականությունները: Շատերն ասում են` ինչո՞ւ եք դանդաղում, մենք չենք դանդաղում, մենք ամեն ինչ անում ենք իր ժամանակին, այդ դուք եք շտապում, դանդաղ շտապեք»,- ասաց Շարմազանովը: