ՀՀ ԶՈւ-ն ձեռք կբերի նոր և արդիականացված զինատեսակներ. Դավիթ Տոնոյան

2019-2020 թթ.  ՀՀ զինված ուժերը, պայմանագրային և վարկային հիմունքներով,  տարբեր երկրներից ձեռք են բերել և բերելու են մեծ մասամբ նոր  և  արդիականացված զինատեսակներ: Այս մասին ԱԺ-ում բյուջետային քննարկումների ավարտից հետո, ըստ Yerkir.am-ի, լրագրողների հետ ճեպազրույցի ընթացքում հայտնեց պաշտպանության նախարար Դավիթ Տոնոյանը՝ տեղեկացնելով նաև, որ  նոր ինքնաթիռները Հայաստան են ժամանելու  դեկտեմբեր, հունվար, փետրվար ամիսներին: 

Հարցին՝ գո՞հ է, արդյոք, 2020 թվականին բանակին տրամադրվող ֆինանսական միջոցների ծավալներից նախարարը պատասխանեց. «Եթե վերցնում ենք մեգանպատակը, այսինքն՝  այն մարտահրավերները,  որ մենք ունենք,  իհարկե, որպես պաշտպանության նախարար, կուզենայի կրկնապատկել, եռապատկել այդ  բյուջեն: Բայց,  հաշվի առնելով մեր տնտեսական հնարավորությունները, պետք է ասել, որ  այսօրվա բյուջեն բավարար է, որպեսզի բոլոր մարտահրավերներին արձագանքենք պատշաճ կերպով»: