1 միլիարդ դրամ՝ ֆինանսների նախարարությանը` արդիականացված տեղեկատվական համակարգն ավելի արդիականացնելու համար

Կառավարությունն այսօրվա նիստում իրեն հերթական շռայլությունը թույլ տվեց` պահուստային ֆոնդից ուղիղ 1 միլիարդ դրամ հատկացնելով ֆինանսների նախարարությանը: Նպատակն, անկեղծ, անհասկանալի է: Գումարը հատկացվել է Մաքսային միությանը և Բելառուսի, Ղազախստանի, Ռուսաստանի միասնական տնտեսական տարածքին Հայաստանի Հանրապետության անդամակցության շրջանակներում Հայաստանի մաքսային մարմինների տեղեկատվական համակարգերի արդիականացման կամ նոր տեղեկատվական համակարգերի ներդրման աշխատանքների իրականացման համար:

Ինչո՞ւ է տարօրինակ, որովհետեւ Գագիկ Խաչատրյանի ղեկավարած նախկին կառույցը` ՊԵԿ-ը, միակ գործը, որ պարտաճանաչ կատարում էր, տեղեկատվական համակարգերի ներդրումն էր, և նախորդ տարիների ընթացքում արդեն մի քանի միլիարդ դրամ ծախսվել է: Համակարգն էլ ներդնելիս ամեն անգամ շեշտվում էր, որ սա բարձրակարգ էլեկտրոնային տեղեկատվական համակարգ է` եվրոպական չափանիշներին համապատասխան:

Պարզվում է, սակայն, եվրոպական չափանիշների մաքսային և հարկային տեղեկատվական համակարգը ռուսների չափանիշով չէ, և մեկ միլիարդ դրամ էլ դեռ պետք է վատնենք առանց այն էլ արդիականացված համակարգն առավել արդիականացնելու համար: