2015-2019 թթ. ՀՕՄ–ի բարեսիրական, մարդասիրական և կրթական ծրագրերի հանրագումարը կազմել է 12 մլն դոլար

Մոնրեալում շարունակվող Հայ Օգնության Միության (ՀՕՄ)  72-րդ Համահայկական ժողովի ընթացքում «Հորիզոնը» հատուկ հարցազրույց է վերցրել ՀՕՄ-ի կենտրոնական վարչության ատենապետուհի Կարոլին Շմավոնյանի հետ, ով ՀՕՄ-ի ծավալած բարեսիրական և մարդասիրական առաքելությունների շրջանակում հատկապես առանձնացրեց զինվորին և հայոց բանակին նեցուկ կանգնելու կարևորությունը։ Նա հաստատեց, որ 2016 թ․ Արցախի քառօրյա պատերազմին հաջորդող ժամանակահատվածում ՀՕՄ-ը 500 հազար դոլարով աջակցություն է ցուցաբերել Հայոց բանակին։ Ընկերուհի  Շմավոնյանը հայտնեց նաև, որ անցնող չորս տարում ՀՕՄ-ի բարեսիրական, մարդասիրական և կրթական ծրագրերի հանրագումարը կազմել է 12 մլն դոլար։ 

Հայ Օգնության Միության 72-րդ Համահայկական պատգամավորական ժողովն իր աշխատանքները Մոնրեալում շարունակում է։ Անցնող 4 օրերի ընթացքում 27 երկրից ժամանած պատգամավորներն ու ներկայացուցիչները քննարկելու են Հայ Օգնության Միությանը շահագրգռող խնդիրներն ու մշակելու են առաջիկա չորս տարվա գործունեության ծրագիրը, որն ընդգրկելու է ՀՀ-ի, Արցախի, Ջավախքի և Սփյուռքի գաղթօջախներում բարեսիրական աշխատանքների ընդհանուր շրջանակը։ Ժողովը կարևորությամբ շեշտեց հայկական վարժարանների ու հայեցի կրթության հանդեպ ՀՕՄ-ի հանձնառությունը։

1992 թվականից ի վեր, ՀՕՄ-ի շնորհիվ, հովանավորներ ունեն զոհված ազատամարտիկների և երկկողմանի ծնողազուրկ շուրջ 8000 երեխա՝ ՀՀ-ում և Արցախում։ Ապրիլյան քառօրյա պատերազմից անմիջապես հետո ՀՕՄ-ի ջանքերով  հովանավորվել են զոհված զինծառայողների ավելի քան 70 երեխա։

Ապրիլայն քառօրյա պատերազմից հետո «Ուժեղ բանակ, ամուր սահման՝ հզոր հայրենիք» ծրագրով Հայոց բանակի բոլոր վիրավոր զինծառայողները եղել են ՀՕՄ-ի հոգածության ներքո, և ստեղծվել է սերտ համագործակցություն Հայրենիքի պաշտպանի վերականգնողական կենտրոնի հետ։ 

ՀՕՄ-ի Արցախի «Սոսե» մանկապարտեզների ցանցը գործում է Ստեփանակերտում, Շուշիում, Տողում, Մեծ Թաղերում, Աշանում, Ականաբերդում,  Քարեգահում և Խնձրիստանում, իսկ 2017 թ․ ՀՕՄ-ի նյութական օժանդակությամբ վերանորոգվել է Ստեփանակերտի «Սոսե» մանկապարտեզի ժամանակակից եռահարկ շենքը, ուր իրենց նախադպրոցական կրթությունն են ստանում 130 երեխա։

Հայաստանի սահամանապահ գյուղերի ռազմավարական նշանակությունը նկատի ունենալով, ՀՕՄ-ի Հայաստանի շրջանային վարչությունը ուսումնասիրելով սահամանմերձ գյուղերի հիմնախնդիրները, նախաձեռնել է «Սահմանապահ և սահմանամերձ գյուղերի օժանդակություն» ծրագիրը, որը նպատակ ունի նպաստելու սահմանների պաշտպանության ամրապնդմանն ու գյուղերում տնտեսության զարգացմանը։  

72-րդ Համահայկական ժողովի օրակարգերում հատուկ տեղ է գրավում նաև սիրիահայերին աջակցելու օրակարգը։

Ժողովին մասնակցում են ՀՀ-ից, Արևելյան ԱՄՆ-ից, Լիբանանից, Կանադայից, Արևմտյան ԱՄՆ-ից, Ավստրալիայից, Հունաստանից (Մակեդոնիա և Թրակիա), Հարավային Ամերիկայից, Ֆրանսիայից, Բուլղարիայից, Արցախից, Ջավախքից, Կիպրոսից, Անգլիայից, Գերմանիայից, Եգիպտոսից, Սթոքհոլմից (Շվեդիա) և Քուվեյթից ժամանած 47 պատգամավորներ։ 

ՀՕՄ-ի կառույցն ունի 12 շրջան և 18 մեկուսի միավոր։ 1910-ին հիմնված Հայ Օգնության Միությունն այսօր 12 հազար անդամներով գործունեությունը շարունակում է 27 երկրում։