Կյանքը՝ մարզերում. Լոռու մարզի Այգեհատ գյուղում նշվել է Բերքի տոնը

Լոռու մարզի Օձուն խոշորացված համայնքի Այգեհատ գյուղում  անցկացվեց «Բերքի տոն»  խորագրով ամենամյա միջոցառումը:

Արդեն ավանդական դարձած՝ Լոռու մարզային բերքի տոնին ներկայացված էին  ֆերմերների ցուցադրած և վաճառքի համար նախատեսված անուշահամ,  թարմ  և վերամշակված մրգերն ու բանջարեղենը և այլ բարիքներ:

Տոնակատարությանը ներկա էին մարզպետ Անդրեյ Ղուկասյանը,  Գուգարաց թեմի առաջնորդ՝ Գերաշնորհ տեր Սեպուհ արքեպիսկոպոս  Չուլջյանը, ԱԺ պատգամավորներ, մտավորականներ, այլ  պատվարժան հյուրեր:  Ներկաներին իր ողջույնի խոսքը հղեց Անդրեյ Ղուկասյանը՝ շնորհակալություն հայտնելով միջոցառումը նախաձեռնող ու կազմակերպչական աշխատանքներն իրականացնող խմբին: Իր օրհնության խոսքն ասաց  Գուգարաց թեմի առաջնորդը՝  ներկաներին մաղթելով խաղաղություն, իսկ համայնքին՝ բարգավաճում: Ֆերմերներին պատվոգրեր և շնորհակալագրեր հանձնվեցին:

Ամբողջ միջոցառման ընթացքում հնչեցին կենդանի երաժշտություն,  ավանդական երգ ու պարը, որն ապահովում էին մարզի գրեթե բոլոր համայնքներից ժամանած պարային և երաժշտական խմբերը, մեներգիչները: Հաղորդավարները  ներկայացրեցին  բերքի տոնի և դրա ՝ավանդական լինելու խորհուրդը: Միջոցառումը վարում էին Պոեզիայի թատրոնի ղեկավար, ասմունքող, «Մովսես Խորենացի» մեդալակիր Ջիվան Սարգսյանը և ասմուքող, դերասանուհի Հրաչուհի Լոռեցյանը: Ներկաները միջոցառումից հեռացան ջերմ տպավորություններով:

Նյութը՝ Հրաչուհի Լոռեցյանի