Ավտոներկրողներին զիջել են վեց ամիս. մեքենաների վաճառքի հին կարգը կգործի մինչև հուլիս

Ավտոմեքենաների վաճառքի հին կարգի ժամկետը երկարաձգվել է ևս 6 ամսով. այն կգործի մինչև 2020 թվականի հուլիսի 1-ը: Այս որոշումն ուժի մեջ է մտնում այսօրվանից՝ հոկտեմբերի 5-ից՝ համաձայն ՀՀ Կառավարության՝ սեպտեմբերի 26-ի նիստին ընդունված «Հայաստանի Հանրապետության կառավարության 2010 թվականի սեպտեմբերի 9-ի N 1251-Ն որոշման մեջ փոփոխություններ և լրացումներ կատարելու մասին» որոշման:

Սույնով կարգավորվում են նաև օտարերկրացիների, քաղաքացիություն չունեցող անձանց, փախստական ճանաչված, ապաստան հայցողի և ժամանակավոր պաշտպանություն ստացած փախստականի կողմից տրանասպորտային միջոցների հաշվառման դեպքում բնակության փաստը հավաստելու հետ կապված իրավահարաբերությունները:

Փոփոխության ենթարկվել է միայն այն հատվածը, որը վերաբերում է ավտովաճառքի կարգին: Որոշումն ընդունվել է հետևյալ խմբագրմամբ. օտարերկրացիներին Հայաստանից մեքենա գնելու համար անհրաժեշտ է լինելու Հայաստանում նրա օրինական բնակությունը հաստատող՝ մշտական կացության կամ ժամանակավոր կացության քարտ, կամ ՀՀ հատուկ անձնագիր, իսկ օտարերկրացիների՝ մեքենա գնելու կարգի փոփոխությունն ուժի մեջ կմտնի 2020-ի հուլիսի 1-ից:

Հիշեցնենք, որ ավտոներկրման համար ԵԱՏՄ օրենքը Հայաստանում պիտի ուժի մեջ մտներ 2020թ. հունվարի մեկից: Ամիսներ շարունակ այդ օրենքի դեմ բողոքում են ավտոներկրողները՝ հավաստելով, որ դրանով կտրուկ բարձրանում են ներկրվող մեքենաների մաքսային վճարները: Նրանք պահանջում էին համաձայնություն ձեռք բերել ԵԱՏՄ գործընկերների հետ՝ այս օրենքի կիրառումը ևս մի փոքր հետաձգելու համար:

Օրեր առաջ՝ հոկտեմբերի երեքին ևս, ավտոներկրողները բողոքի ակցիա էին իրականացրել Կառավարության շենքի դիմաց՝ պահանջելով վերացնել ԵԱՏՄ այլ պետությունների քաղաքացիների վերաբերյալ սահմանափակումները և 2020 թ.-ի հունվարի 1-ից հետո ևս երկու ամիս ժամանակ տրամադրել՝ մեքենաները այժմյան մաքսային գներով մաքսազերծելու համար: