Բուժականցի Մուրադն այսօր կդառնար 48 տարեկան

Սեպտեմբերի 5-ը Բուժականցի Մուրադի ծննդյան օրն է։ Այսօր նա կդառնար 48  տարեկան։

Ազատամարտիկ, ՀՀ բանակի լեյտենանտ Մուրադ Զաքարյանը կամ Բուժականի Մուրադը ծնվել է 1971 թվականի սեպտեմբերի 5-ին Արագածոտնի մարզի Բուժական գյուղում։ 1989-1991 թվականներին ծառայել է ԽՍՀՄ ԶՈՒ-ում։ 1991-1994 թվականներին եղել է Շուշիի առանձնակի գումարտակի վաշտի հրամանատարի տեղակալ։

Մասնակցել է Շահումյանի, Մարտակերտի, Հադրութի, Շուշիի շրջանների, Բերդաձորի ենթաշրջանի (Կիրով, Եղցահող և այլն) ինքնապաշտպանական և ազատագրական մարտերին։ 1993 թվականին վիրավորվել է, ապաքինվել և վերադարձել մարտադաշտ։

Պարգևատրվել է Արցախի Հանրապետության «Մարտական խաչ» 2-րդ աստիճանի շքանշանով։ Մուրադ Զաքարյանի մասին նկարահանվել է «Բուժականի Մուրադը» ֆիլմը (2001, «Խոնարհ հերոսներ» ֆիլմաշար, սցենարի հեղինակ և ռեժիսոր՝ Ս. Թադեոսյան)։

Զոհվել է 1994 թվականի մարտի 23-ին Ֆիզուլիի շրջանի Սեյիդահմեդլու գյուղում։ Թաղված է Բուժականում։