Ղրղզստանի նախագահը նախկին նախագահին մեղադրում է սահմանադրության խախտման մեջ

Ղրղզստանի Հանրապետության նախագահ Սոորոնբայ Ժեենբեկովը հայտարարել է, որ նախկին նախագահ Ալմազբեկ Աթամբաևը կոպիտ խախտել է սահմանադրությունը՝ դիմակայություն ցույց տալով իրավապահներին, փոխանցում է РИА Новости-ն: Այս մասին նա հայտարարել է Հանրապետության Անվտանգության խորհրդի նիստում:

Նրա խոսքով՝ Աթամբաևը «կոպիտ խախտել է սահմանադրութունը և օրենքները»: Գործող նախագահն ընդգծել է, որ Ղրղզստանն իրավական պետություն է: Նա ԱԽ անդամներին հանձնարարել է անհապաղմիջոցներ ձեռնարկել երկրում օրինականության և անվտանգության պահպանման համար:

Աղբյուրի փոխանցմամբ՝ Աթամբաևը հայտարարել է, որ իր ձերբակալման պահին կրակել է, ընդ որում, նա ընդգծել է, որ իր կողմնակիցների մոտ որևէ զենք չի եղել:

«Հեռուստացույցով բոլորը խաբում են: Ես կրակել եմ, երբ տղաները գնացել են երրորդ հարկ: Փորձում էի չդիպչել նրանց», — հայտարարել է Աթամբաևը:

Ղրղզստանի նախկին նախագահն իր նստավայրի օգոստոսի 7-ի  գրոհից հետո  կոչով դիմել է երկրի իրավապահ մարմիններին:

Նա դիմել է նաեւ իր կողմնակիցներին եւ հայտարարել է, որ մտադիր է Բիշքեկում հանրահավաք անցկացնել:

«Մենք հանրահավաքը սկսելու ենք  Բիշքեկում «Մեդիա Ֆորումի» շենքի մոտից, այնուհետև տեղափոխվելու ենք  «Սպիտակ տուն»», — հայտարարել է Աթամբաևը:

Նրան ձերբակալելու հատուկ գործողության ժամանակ տուժածների  թիվը, աղբյուրի տվյալների, հասել է 52-ի: