Ս-400-ները կիրառվելու են ակտիվորեն. Թուրքիայի նախագահական

Թուրքիայի նախագահի խոսնակ Իբրահիմ Քալընը հայտարարել է, որ Ռուսաստանից մատակարարվելիք Ս-400 ՀՕՊ համակարգերը ակտիվորեն են կիրառվելու: Մամուլի ասուլիսի ժամանակ Քալընը նշել է, որ այդ համակարգերը պաշտպանական են և վտանգ չեն առաջացնի:

«Այս համակարգը ՆԱՏՕ-ում տեղ գտած անվտանգության համակարգերի համար վտանգ չի դառնա: Մեր ՊՆ-ն և ռազմաօդային ուժերի հրամանատարությունը կորոշեն, թե որտեղ կտեղադրվեն դրանք»,- Քալընի խոսքերն է մեջբերում «Euronews»-ի թուրքական ծառայությունը:

Էրդողանն իր հերթին հայտարարել էր, որ, եթե «Պատրիոտ»-ները Ս-400-ներին հավասար են, դրանք էլ կգնեն, սակայն հակառակ դեպքում իրենք կմտածեն սեփական շահերի մասին: Նա հավելել էր, որ Ս-400-ների առաջին խմբաքանակը 10 օրվա ընթացքում կլինի Թուրքիայում:

Նշենք, որ թուրքական լրատվամիջոցներում շրջանառվում են այն լուրերը, ըստ որոնց` առաջին խմբաքանակը կմատակարարվի առաջիկա կիրակի օրը: