Թուրքիան քննադատել է The Washington Post-ին

Թուրքիայի արտաքին գործերի նախարարությունը հայտարարություն է տարածել, որում քննադատում է ամերիկյան The Washington Post պարբերականին: Երեկ Քուրդիստանի աշխատավորական կուսակցության (PKK) 5 հիմնադիրներից մեկը`  Ջամիլ Բայըքը, հոդված էր հրապարակել պարբերականում, ինչը զայրույթ է առաջացրել Թուրքիայում. տեղեկացնում է «Անադոլու» գործակալությունը:

«Հիմա քրդական և թուրքական պետությունների միջև խաղաղություն հաստատելու պահն է, եկեք չվատնենք այն» վերնագրով հոդվածում Բայըքը անդրադառնում է Թուրքիայում քրդերի խնդրին ու պայքարին և նշում, որ 1923 թվականից` Թուրքիայի Հանրապետության հիմնադրումից ի վեր, քրդերը ենթարկվել են ճնշումների և խտրականության:

Ի պատասխան` Թուրքիայի ԱԳՆ-ի հայտարարության մեջ ասվում է. «Ինչպես մի շարք երկրներում, այնպես էլ ԱՄՆ-ում ահաբեկչական խմբավորումների ցուցակում գտնվող, տասնյակհազարավոր անմեղ մարդկանց կյանքը վայրենաբար խլած ՔԱԿ-ի առաջնորդներից մեկը, այսօր օգտագործելով The Washington Post-ը, հրապարակային ահաբեկչության քարոզ է անում: Այս հրապարակումով ծանրագույն կերպով խախտվում է միջազգային հանրության` ահաբեկչության դեմ պայքարում ամենահիմնական պարտավորությունը համարվող` «ահաբեկչության խթանման կանխարգելման» սկզբունքը: Անհրաժեշտ է, որպեսզի ահաբեկչության դեմ պայքարում ոչ մի խտրականություն չդրվի ահաբեկչական կազմակերպությունների միջև: Սա երկերեսանիության նոր և ռիսկային օրինակ է»: