Լրագրողների ձերբակալմամբ Թուրքիան ավելի է հեռանում ժողովրդավարությունից՝ ընկնելով տգիտության փոսը. Washington Post

Ամերիկյան Washington Post թերթը Թուրքիայում ձերբակալված լրագրողներին ազատ արձակելու կոչ է արել երկրի նախագահ Ռեջեփ Թայիփ Էրդողանին:

Հիշեցնելով խոսքի ազատության մասին՝ կայքը գրել է.«Ջան Դյունդարն ու Էրդեմ Գյուլն ընդամենը իրականացրել են իրենց լրագրական պարտականությունները: Դա հանցանք չէ»:

Նշելով փաստը, որ Թուրքիայում ամեն կերպ փորձում են լռեցնել լրագրողներին, իսկ այդ ուղղությամբ արված բոլոր քայլերը սխալ են, կայքը լրագրողներին ցմահ ազատազրկելու պահանջը «շոկային» է որակել:

 «Նման որոշումները կարող են ընդունելի լինել բռնություն պարունակող հանցանքների դեպքում, սակայն ոչ այս դեպքում… Թուրքիայի նախագահը, ըստ երևույթին, վճռական է լրագրությունը որպես սարսափելի հանցանք ներկայացնելու հարցում: Նման երևույթները ՆԱՏՕ-ի դաշնակից Թուրքիային ավելի են հեռացնում ժողովրդավարությունից՝ գցելով նրան ավտորիտարիզմի և տգիտության փոսը»,-գրել է Washington Post-ը:

Եզրափակելով հոդվածը՝ կայքն առանձնահատուկ դիմել է Էրդողանին. «Պարո\'ն Էրդողան, Թուրքիայում բանտարկված մեծ թվով լրագրողները, այդ թվում` Cumhuriyet-ի երկու լրագրողները, պետք է ազատ արձակվեն: Այս անձինք ընդամենը լրագրությամբ են զբաղվում և խոսքի ազատության իրավունքն օգտագործում: Սրանք հանցանք չեն»:

Հիշեցնենք, որ ընդդիմադիր լրագրողները մեղադրվում են ահաբեկչական խմբավորումների հետ առնչություն ունենալու, ռազմական լրտեսություն իրականացնելու, գաղտնի նյութեր հրապարակելու մեջ: Վերջերս նրանց ցմահ ազատազրկելու պահանջ էր ներկայացվել դատարանում: