Ինչու Վրաստանը չի գտնի ռուսաստանցի զբոսաշրջիկներին փոխարինողների

Վրաստանը չի գտնի այլընտրանք ռուսաստանցի զբոսաշրջիկներին: Նման կարծիք իր ֆեյսբուքյան էջում հայտնել է ՌԴ Դաշնային խորհրդի անվտանգության հարցերով հանձնաժողովի անդամ Ֆրանց Կլինցևիչը. հայտնում է Спутник-Грузия-ն:

«Արևմտյան զբոսաշրջիկը, որի հետ հույսեր են կապում, սովոր է իր հանգիստը ծրագրել մեկ տարի առաջ, բացի այդ` նա ավելի պահանջկոտ է, քան ռուսաստանցի զբոսաշրջիկը, իսկ Վրաստանը, ինչպես հայտնի է, եվրոպական սպասարկում դեռ չի կարող ապահովել»,- գրել է նա` հավելելով, որ ռուսաստանցի զբոսաշրջիկի համար Վրաստանը նաև շարունակում է լինել գենետիկորեն մտերիմ երկիր:

Հիշեցնենք, որ ցույցերը Վրաստանում շարունակվում են արդեն գրեթե 4 օր: Զանգվածային բողոքի պատճառ է դարձել երկրի  խորհրդարանում ՌԴ Պետդումայի պատգամավոր, Ուղղափառության միջխորհրդարանական վեհաժողովի նախագահ Սերգեյ Գաբրիլովի՝ խորհրդարանի խոսնակի աթոռից ելույթ ունենալու փաստը:

ՌԴ նախագահ Վլադիմիր Պուտինը հուլիսի 8-ից ժամանակավորապես արգելեց թռիչքները դեպի Վրաստան` ռուսաստանցիների անվտանգության նկատառումներից ելնելով: